Sport

Ligin’ny Rugby eto Analamanga Naato 5 minitra noho ny orana ny lalaon’i Matadore A sy XV Family

Sport
Alatsinainy 12 Novambra 2018

Nosokafana omaly alahady 11 novambra tetsy amin’ny kianja Malacam Antanimena ny taom-pilalaovana 2018-2019 ho an’ny ligin’ny rugby eto Analamanga tarihan-dRavelojaona La Pie.

Lalao 3 tamin’ireo fihaonana 5 voalahatra tao anaty fandaharam-potoana no tontosa noho ny tsy fahatongavan’ny fileovana Tam Anosibe izay niharam-boina noho ny fahafatesan’ny mpilalao vehivavy iray tao aminy tamin’ireo hain-trano nitranga tao Anosibe tamin’ny herinandro lasa teo. Ny lalao faran’ny sokajy D-1 lehilahy Elite 1 kosa nifanandrinan’ny Matadore Anosipatrana sy ny XV Family Vondrona dia voatery naaton’ny mpitsara 5 minitra raha vao nanomboka kely ny fidirana faharoa noho ny orana nikija. Nitarika tamin’ny isa 12 no ho 11 ny XV Family tamin’izay nefa lavon’ny Matadore A 16 -12 izy ireo tamin’ny farany.

Voka-dalao azo omaly tetsy Malacam :

Sokajy vehivavy : Matadore A nandresy ny Tam tamin’ny “Forfait” , Uasc 42 – 00 Fanjan’Anjanahary.

Sokajy lehilahy D-1 elite 1 : Fta nandresy ny Tam tamin’ny “Forfait” , Uasc 45 – 27 Ftat, Matadore A 16 – 12 XV Family.

Ntsoavina Evariste