Sport

Ligin’ny baolina kitra any Atsimo Andrefana Efa vonona tanteraka handray ny fifidianana FMF vaovao

Sport
Alakamisy 22 Aogositra 2019

Efa vonona tanteraka izahay mpitantana ny ligin’ny baolina kitra aty Atsimo Andrefana, hoy ny filohany Randrianantenaina Régis

tafaresaka nivantana an-telefaonina tamin’ny Tia Tanindrazana omaly alarobia 21 aogositra, handray ny AGE hifidianana izay ho filoha vavaon’ny FMF sy ireo mpikambana handrafitra ny komity mpanatanterak’izany rafitra hitantana ny baolina kitra Malagasy izany mandritra ny 4 taona ho avy. Efa milamindamina avokoa ny pitsopitsony ilaina rehetra hanatanterahana ny hetsika, hoy izy, ary efa eto an-toerana ihany koa ny sekretera jeneralin’ny “Comité de normalisation FMF” hanampy sy hanome toromarika amin’izay tokony hatao rehetra. Efa vonona ny toerana handraisana an’ireo vahiny ao Ifaty hanatanterahana ny fifidianana ary efa azo antoka tsara ny fitandroana ny filaminana aloha sy mandritra ary aorian’ny fanatanterahana ny fifidianana. Efa misy ireo solontenana ligy mpifidy izay akaiky an’i Toliara no efa tonga aty an-toerana omaly alarobia ary maromaro no handrasana ho tonga anio alakamisy 22 aogositra 2019. Amin’ny ankapobeny dia efa vonona tanteraka izahay aty Atsimo Andrefana amin’ny fandraisana ny hetsika manontolo.