Sport

Ligin ‘i Bongolava Notolorana amboara omaly ny Ajesaia na eo aza ny fitoriana

Sport
Alatsinainy 18 Febroary 2019

Tontosa omaly alahady 17 febroary 2019 tao amin’ny kianjan’i Tsiroanomandidy ny andro farany teo amin’ny lalao Poule des As tamin’ny fiadiana ny ho tompondakan’ny ligin’ny baolina kitran’i Bongolava sokajy D-1 ka nahazoana ny vokatra :

As Andry - Fc Miray Bevato (6-1) ary ny lalao ny Ajesaia - Bel’Air (7-0). Nambaran’ny ligin’i Bongolava fa voahosotra ho tompondakany taona 2018 ka notolorana amboara sy medaly volamena tao Tsiroanomandidy omaly alahady 17 febroary 2019 ny ekipan’ny Ajesaia na dia teo aza ny « réserve de qualification » nataon’ny As Andry sy ny Fc Miray Bevato tamin’ity poule des As ity noho ny raharaha Rajoarimanana Avotriniaina Yvan nampilalaovin’ny Ajesaia nefa tsy mazava ny taratasy fifindrany ho ao amin’ity klioba ity. Nosaziana tsy nahazo nandray anjara tamin’ny fifaninanana intsony i Yvan mandra-piandry ny taratasy “Cetificat transfert international” avy any La Réunion hahazoany milalao eto Madagasikara indray, hoy ny ligin’i Bongolava. Mbola manjavozavo, araka izany, ny amin’ity tompondakan’i Bongolava ity na dia nandresy hatrany aza ny Ajesaia teo amin’ny “poule des As”.

Ntsoavina Evariste