Sport

Lalaon’ny nosy andiany faha-10 Laharana faha-2 i Madagasikara

Sport
Alatsinainy 29 Jolay 2019

Nifarana tamin’ny fomba ofisialy omaly alahady 28 jolay 2019 ny lalaon’ny nosy andiany faha-10 notontosaina tany amin’ny nosy Maorisy.

Laharana faha-2 no nisy an’i Madagasikara tamin’ny ankapobeny raha ry zareo mpampiantrano no nitana ny laharana voalohany. Medaly volafotsy 2 teo amin’ny taranja volley-ball lahy sy vavy sy medaly volamena 2 hafa teo amin’ny taranja basket-ball no medaly farany norombahin’ny atleta Malagasy tamin’ireo lalao natrehany farany tamin’ny sabotsy 27 jolay 2019 teo. Tsy afa-bela tamin’i Seychelles ny mpilalao volley-ball vehivavy Malagasy fa mbola resy tamin’ny seta 3-2 indray. Tsy nahatohitra ny mpilalao volley-ball avy any La Réunion ihany koa ny mpilalao volley Malagasy lehilahy ka resy tamin’ny seta 3-0 be izao. Tsy namelan'ny Atleta Malagasy kosa tetsy an-kilany raha tsy norombahan'izy ireo ny medaly volamena teo amin’ny taranja basket-ball lehilahy nanoloana an’i Mayotte izay resiny tamin’ny isa 85-49 teo amin’ny lalao famaranana. Mbola lasan’i Madagasikara ihany koa ny medaly volamena teo amin’ny taranja basikety sokajy vehivavy rehefa avy nandavo an’i La Réunion 90-77 teo amin’ny famaranana izy ireo.