Sport

Lalaon’ny Barea sy Tonizia Hosorohana ny delestazy eto Iarivo, hoy ny Jirama

Sport
Alarobia 10 Jolay 2019

Hampitomboina ny tanjaky ny herinaratra vokarin’ny Jirama eto Antananarivo ho an’ny rahampitso alakmisy 11 jolay hisian’ny lalao baolina kitra goavana hifanandrinan’i Tonizia sy ny Barean’i Madagasikara eo amin’ny dingana ampahefa-dalan’ny CAN 2019.

Niteraka fimenomenonana tamin’ny olona ny fahatapatapahan’ny herinaratra tamin’ireo lalao teo aloha, toy ny fifandonana tamin’ny RD Congo. Niakatra ny taham-pampiasana ny herinaratra satria samy mandefa ny fahitalavitra ny olona, hany ka tsy zakan’ny tosiky ny herinaratra intsony, raha ny fanazavana tsotsotra. Efa nilaza ny hitondra vahaolana sy mba hitsitsy ny fandaniana toy ny fampiasana zavatra matanjaka be ny Jirama mandritra io fotoana io, fa mba ny fahitalavitra ihany. Hisy ihany koa ny fiomanana amin’ny famahana olana haingana amin’ireo toerana sy faritra tena efa voamarika fa matetika misy olana ny famatsiana. Heverina izany fa hisitraka herinaratra ara-dalàna tsy misy olana ny rehetra rahampitso, ary hirariana mba tena hisy vahaolana tsy vonjy tavanandro fa maharitra. Raha ho an’ny omaly mantsy izao, dia toerana am-polony maro teto Antananarivo sy manodidina no nisedra fahatapahan-jiro.

Toky R