Sport

Partagé sur :
• facebook

Mbola misy delegasiona taraiky ary mety tsy ho lasa intsony hiatrika ny Lalaon’ny Nosy atao any la Reunion (1-9 aogositra).

 Miisa maherin’ny 30 no mbola niezaka nikarakara “visa” omaly tetsy amin’ny masoivoho frantsay fa tsy nety voaray intsony. Saika efa lasa tsy eto intsony rahateo ireo tena tomponandraikitra tokony hamaha ny olana. Misy amin’ireo mbola taraiky eto ny atleta, mpanazatra, mpitsara, mpitsabo ary mpanao gazety. Mbola miisa 14 eo ireto farany. Taranja kosa no mbola manana solontena tavela eto dia ny baskety, baolina kitra, atletisma, volley, lomano, handisport, ady totohondry ary bisikileta. Nisy ny fifampiantsoana tamin’ny finday tamin’ireo tomponandraikitra efa any la Reunion toy ny minisitry ny tanora sy fanatanjahantena ary ny talen’ny fanatanjahantena federaly izay samy nampanantena ny hitady vahaolana saingy tsy nahenoana valiny hatramin’ny omaly alina. Efa nisy fikatsahana fanohanana avy tamin’ny fiadidiana ny repoblika fa tsy nitondra vahaolana koa izany. Ny heno farany dia mbola nalefa any amin’ny prefektoran’i la Reunion ireo lisitry ny delegasiona taraiky ireo ary izay no heverina fa hakana “visa” any an-toerana ahafahana miditra any la Reunion. Efa misasaka ihany anefa ny Lalao. Tsy mbola nisy toy ity teo amin’ny tantaran’ny Lalaon’ny Nosy. Ny fitavozavozana tany amin’ny fikarakarana ny taratasy no lasa hanomezana ny masoivoho frantsay sy hilazana fa sarotiny izy ireo.

Rasanda Serge

Tia Tanindrazana

Samia mijoro ho an'i Gasikara.