Sport

Kitra vehivavy DEFF 3 2018 Lavon’ny Askam Itasy 7-1 ny Prescoi Livak

Sport
Talata 07 Mey 2019

Ny filoha lefitry ny Comité de normalisation Fmf Malagasy, Benony Jacques, no nanokatra ofisialy ny fifaninanana baolina kitra vehivavy “Division Elite”

fiadiana ny ho tompondaka 2018 dingana faha-3 teny amin’ny kianjan’i Carion, omaly alatsinainy 06 mey 2019. Nasongadina taorian’ny filaharana nataon’ireo ekipa 8 mandray anjara ny tokony hampisehoan’izy ireo ny “Fair Play” mandritra ny fifaninanana manontolo ka nilazany fa hanolotra amboara manokana ho an’izay ekipa mendrika amin’izany “Fair Play” izany ny “Comité de normalisation” amin’ny fiafaran’ny fifaninanana.

Nandritra ny andro voalohany notontosaina omaly alatsinainy 06 mey 2019 dia ny ekipan’ny Assot Analamanga no nibata ny fandresena voalohany rehefa nandresy ny As Comato Atsimo Andrefana 3-1. Nisongadina indrindra kosa ny nanamontsanan’ny Askam Itasy 7-1 ny Prescoi Vakinankaratra teo amin’ny lalao faha-3. Ny Mifa Analamanga kosa nandresy ny Ascuf Matsiatra Ambony 2-0 teo amin’ny lalao faha-2 ary ny Ac Sab Nam Analamanga nandresy ny Som Boeny 3-0 teo amin’ny lalao faha-4.

Ntsoavina Evariste