Sport

Partagé sur :
• facebook

Hotanterahina anio sabotsy sy rahampitso alahady eny amin’ny Futsal Andraharo ny dingan’ny famaranan’ilay “Tournoi des Champions”, fifaninanana baolina kitra ho an’ireo sokajy U13 sy U15 zazalahy izay karakarain’ny Soanaivo Foot-ball Academy.

  Marihina fa efa vita ny 10-14 aogositra teo ny dingan’ny fifanintsanana teny amin’ny kianjan’Alarobia. Ireo ekipa folo mendrika isaky ny sokajy no hiatrika io dingan’ny famaranana io izay hatao eny amin’ny Futsal Andraharo. Marihina fa ireo ekipa voalohany isak’ireo vondrona valo ho an’ny U13 ary ireo roa voalohany isak’ireo vondrona efatra ho an’ny U15 miampy ny ekipa faharoa mendrika indrindra sy ny ekipa ivondronan’ireo mpilalao voafantina no hiatrika io dingan’ny famaranana io. Mbola hozaraina vondrona roa misy ekipa dimy avy ireo ekipa folo amin’ireo sokajy roa ireo ka ireo roa voalohany indray no mbola hiady ny manasa-dalana mialoha ny famaranana. Izay ekipa tompondaka isaky ny sokajy eo moa dia halefa hialasasatra any Mahajanga sady harahina fiofanana mandritra ny herinandro. Aorian’izay kosa dia mbola hanaraka fitsapana sivana ireo mpilalao voafantina isan-tsokajiny hakana ireo andiany voalohany hiofana ao amin’ny Soanaivo Foot-ball Academy.

Ireo ekipa tafita :
Sokajy U13 : FC Bayern, All Stars, FC mamamba, FCF 2AI, RCT, EF Joachim I, TM Christi, Varatra, Honorable FC, ekipa voafantina
Sokajy U15 : EF Joachim, Red Stars, Fav’s FC, Vila Real, FC Mandrangobato, AS Roro, FC Releve, EPN Ivandry, FC King, ekipa voafantina

Tia Tanindrazana

Samia mijoro ho an'i Gasikara.