Sport

Kitra – Poule des As Ny Fosa Juniors no nibata fandresena voalohany

Sport
Alatsinainy 06 Aogositra 2018

Ny ekipan’ny Fosa Juniors Boeny no nibata fandresena voalohany tamin’ny lalao “Poule des As Champions League Malagasy 2018”. Resiny tamin’ny isa 2-1 tetsy Mahamasina tamin’ny sabotsy 4 aogositra teo ny Elgeco Plus Analamanga mpampiantrano.

Ny Elgeco Plus no nahatafiditra ny baolina voalohany tany amin’ny minitra faha-4 ka io isa no no nialana sasatra ary dia saika nanomboka niaro teny ry zareo hatramin’io nahafatesany baolina io saingy nosahalan’ny Fosa Juniors tamin’ny alalan’i Mario teo amin’ny minitra faha-61 izany ary nihoarany 2-1 teo amin’ny minitra faha-78 nahazoany penality nampidirin’i Baggio kapiteny. Afa-bela tamin’ny Elgeco Plus Analamanga izany ny Fosa Juniors Boeny raha resiny tamin’io isa 2-1 ihany koa tany amin’ny dingana faha-2 notontosaina teny Vontovorona tamin’ny 22 jolay 2018. Fa omaly alahady 5 aogositra kosa teny Vontovorona kosa dia tsy afa-bela tamin’ny Cnaps Sport ny Fcv Vakinankaratra fa rehefa resin’izy ireo tamin’ny 3-0 ny 13 jolay teo tany Fianarantsoa tamin’ity “Champions League” ity ihany dia mbola lavony 3-1 ihany tamin’io omaly io na dia nitarika 1-0 azy teo ampialan-tsasatra ny ekipan’ny Cua Antsirabe. Marihana fa any Mahajanga sy Antsirabe no hanatanterahana ny andro faha-2 amin’ity Poule des As 2018 amin’ny alahady 12 aogositra ho avy izao.

Ntsoavina Evariste