Sport

Partagé sur :
• facebook

Vita sonia omaly teny Anosy ny fanaovan-tsonia fifanaraham-piaraha-miasa eo amin’ny federasiona malagasin’ny baolina kitra tamin’ny alalan’ny filohany

Ahmad sy ny Minisiteran’ny fanabeazam-pirenena tamin’ny alalan’ny minisitra Rabary Paul mikasika fanohanan’ny federasiona ny minisitera amin’ny fikarakarana ny fifaninanana fanatanjahantena an-tsekoly. Nanatrika ny fotoana koa ny sekretera jeneralin’ny minisiteran’ny tanora sy fanatanjahantena, Ralaivao Lovatiako.

“Ny fanatanjahantena an-tsekoly amin’ny ambaratongany samihafa no voakasik’izao fiaraha-miasa izao ary natokana ho an’ireo ankizy teraka taorian’ny janoary 2000 mba ho fanomanana ny CAN U17 amin’ny taona 2017”, hoy i Ahmad raha nandray fitenenana.

Tanjona ihany koa, hoy ity farany, ny fanatevenana ilay tetikasa Barea Akademia eny Carion izay tsy ampy ka ilaina ny fivelarana amin’ny firenena iray manontolo. Baolina miisa 200 no efa natolotry ny federasiona omaly ary mbola ho avy ny fampitaovana hafa sy fanofanana teknisianina. Marihina fa fiaraha-miasa maharitra roa taona ary azo havaozina izy io.

Notsipihin’i Ahmad fa tohin’ny tetikasa hafa efa natomboka iarahan’ny federasiona miasa amin’ny Fifa izy ity. Anisan’ireo efa natomboka taona vitsy izay ny “Grass roots” ho an’ny sokajy 8-12 taona ary efa misy fiaraha-miasa amin’ny MEN ka faritany efatra no efa voakasika dia Antananarivo, Mahajanga, Antsiranana ary Toamasina. Ho avy tsy ho ela ny fanapariahana any Fianatrantsoa sy Toliara. Efa nandeha taona vitsy koa koa ny tetikasa “Onze” miaraka amin’ny Fifa ka sekoly 18 no voakasika tany am-piandohana ary efa tafakatra 280 no voakasika amin’izao fotoana.

Tetsy an-kilany, Rabary Paul dia nanipika fa “misokatra ny varavaran’ny minisitera ho an’ireo federasiona hafa rehetra, ny taranja atletisma koa no efa misy fiaraha-miasa fa mila hamafisina ara-taratasy. Tsy fampianarana any an-tsekoly fotsiny no andraikitry ny minisitera fa ilaina ny fanabeazana ara-batana”.

Rasanda Serge

Tia Tanindrazana

Samia mijoro ho an'i Gasikara.