Sport

Partagé sur :
• facebook

Niatrika ny lalao fitsapana farany omaly tolakandro tetsy Mahamasina ny Barea nihaona tamin’ny Cnaps ary nivoaka nandresy tamin’ny isa 2-0, baolina izay nosoniavin’i Jeannot Vonimbola (Nono), mpanafiky ny Tana Fc avokoa.

Tao anatin’ny fizaram-potoana voalohany avokoa ireo baolina roa ireo. Mbola ny ekipan’Ampatsakana no nandindona tamin’ny fanombohan’ny lalao ka anisan’ny nanambana an’i Kandy mpiandry harato ny daka mandrivorivon’i Rado izay nidona tamin’ny tsivalam-by ary efa niilana kely tany anaty faritry ny ati-harato mihitsy saingy tsy maty, hoy ny mpitsara. Nanomboka nanindry kosa ry Sedera sy ny namany taty amin’ny 30 minitra nilalaovana ka nanandrana tifi-davitra koa i Carolus saingy naverin’ny tsivalam-by. Tsy ela taorian’izay ny ny baolina voalohany azon’ny Barea izay nampidirin’i Nono (35’) ary dimy minitra taorian’io no namonoany ny faharoa (40’) rehefa voafitany hatramin’i Anathole mpiandry haraton’ny Cnaps izay nivoaka lavitry ny harato. «Ny lafiny taktika no tena nohamafisinay mba ahafahana mametraka tsara ny paikady. Hivondrona foana ireo mpilalao eny ambony kianja, izany hoe hiara-hanamafy ny fiarovana nefa hanafaingana miaraka ny fanafihana», hoy Rasoanaivo Titi mpanazatra. Anio antoandro no hanainga ny delegasiona malagasy hihazo an’i Angola hiatrika ilay lalao miverin’ny fifanintsanan’ny CHAN 2011 izay hatao ao Luanda ny sabotsy izao amin’ny 7 ora hariva, ora eto amintsika.

Tia Tanindrazana

Samia mijoro ho an'i Gasikara.