Sport

Partagé sur :
• facebook

Tsapa tamin’ny fanatrehana ny lalao baolina kitra nihaonan’ny Barean’i Madagasikara sy ry zareo Senegaley omaly alahady 9 septambra fa efa tsy antonona ny mpitia baolina kitra Malagasy

intsony ny fijerem-baolina ao amin’ity kianja ity ka efa fotoanany izao ny tokony hanatsarana azy na hanamboarana toeran-kafa lehibebe kokoa noho izy eto amin’ity renivohitr’i Madagasikara ity. Nanampy trotraka an’izany koa ny tsy fahatomombanan’ny fikarakarana ny fandraisana ny lalao tamin’ny ankapobeny. Na ny fandaminana ny asan’ireo mpanao gazety nahazatra aza toa tsy nandeha tamin’ny laoniny mihitsy fa be ireo tsy nanana « chasuble » sy « badge » tafiditra teny an-tsisin’ny kianja sy tao amin’ny valandresaka ho an’ny mpanao gazety tamin’ny fiafaran’ny fotoana … Nisy ireo nandoa volabe (250.000 Ar sy 150.000 Ar) nefa tsy nahazo toerana akory fa nitsangana no niafarany. Nahita maso an’izany nivantana ny filoham-panjakana vonjimaika Rivo Rakotovao izay inoana fa efa mba nisaintsaina koa na dia voasiotsiokan’ny mpijery tetsy Mahamasina indray aza omaly io. Miantefa any amin’ireo kandidà ho filoham-pirenena 36 ankehitriny koa ny amin’ny vinan’izy ireo amin’izany mba tokony hananan’ny Malagasy amin’izay an’ireny kianjana baolina kitra mifanahantsahana amin’ny any ivelany ireny na dia atsy Afrika misy antsika fotsiny aza. Maninona moa raha mba hasiana an’ireny kianja misy rihana ireny amin’izay eto amintsika ?

Ntsoavina Evariste

Tia Tanindrazana

Samia mijoro ho an'i Gasikara.