Sport

Kianja Saint-Leu-la Foret Frantsa Voatazon’i Comores ady sahala ny Barea mpila ravinahitra

Sport
Alatsinainy 13 Novambra 2017

Azo ambara fa nahaliana ny mpijery baolina tany Frantsa, indrindra ireo mpila ravinahitra Kaomoriana sy Malagasy monina any amin’ity firenena ity ny nanaraka ny lalao ara-piralahiana « derby de l’Océan Indien »

nifanandrinan’ny Barean’i Madagasikara mpila ravinahitra any ivelany sy ny Coelacanthes-n’i Comores tamin’ny sabotsy 11 novambra teo fa feno hipoka ara-bakiteny ny fijerem-baolina tao amin’ny kianjan’i Saint-Leu-la Foret nanatanterahana ny lalao. Vao teo amin’ny minitra faha-6 ny fizaram-potoana voalohany dia efa nahatafiditra baolina tamin’ny alalan’ny daka an-jorony nodakan’i Carolus ary nampidirin’i Pascal Razakanantenaina tamin’ny lohany ny Barea ary nosahalain’ny Kaomorianina teo amin’ny minitra faha-9 ny fidirana faharoa, baolina matin’i Youssouf M'Changama. Dia io ady sahala 1-1 io no nisarahan’ny roa tonta. Na dia hita ho nanatombo ara-teknika sy fitazonam-baolina aza ny Barea dia nifandanja tsara ny lalaon’ny roa tonta ary somary naherihery vaika aza ny fifandonana, indrindra taorian’ny “tacle derrière” nahazo ny mpilalao Kaomoriana iray teo amin’io fidirana faharoa io. Tsy mbola masaka ny fiarahan’ireo mpilalao Malagasy mpila ravinahitra sy ny rindran-damina napetraky ny mpanazatra René Dupuis.

Ntsoavina Evariste