Sport

Kianja mitafon’Antsirabe Miroso ny asa fanorenana

Sport
Zoma 10 Novambra 2017

Mandeha tsara ny asa fanorenana ny “Gymnase” na kianja mitafo ho an’ny tanànan’Antsirabe. Efa ho tapa-bolana no nanombohana ny asa eo amin’ny kianjan’ny piste Vatofotsy.

Velaran-tany hatrany amin’ny 3.000 metatra tora-droa no hanorenana azy. Tonga nitsidika ny fandehan’ny asa fanorenana ny mpanolotsaina manokan’ny filoham-pirenena, Hugues Ratsiferana sy ny lehiben’ny faritra ary ny ben’ny tanànan’Antsirabe. Nohamafisin’Atoa Hugues Ratsiferana fa tafiditra ao anatin’ny fampanantenan’ny filoham-pirenena ity tetikasa ity ka tsy maintsy notontosaina. Nambarany fa tsy hisy fampandrosoana vanona raha tsy misy ny fikolokoloana ny tanora. Hisy toeram-pilomanosana izy io ary azo handraisana fifaninanana iraisam-pirenena ihany koa, toy ny toeram-pilalaovana baskety sy hand-ball izay hanara-penitra tokoa. Nambaran’ny ben’ny tanàna Razanakolona Paul fa mitentina 3 miliara sy sasany ity fotodrafitrasa ity. Nisaorany manokana ny lehiben’ny faritra nanolotra ny tany hanorenana ny fotodrafitrasa. Hahazaka olona hatrany amin’ny 3.000 indray miditra ny Gymnase ary ho azo ampiasaina na andro na alina rehefa vita. Hisy ny jiro hiaraka aminy. Fanirian’ny ben’ny tanàna ny hitokanan’ny filoham-pirenena ny fotodrafitrasa amin’ny volana jona 2018.

Caius R