Sport

Partagé sur :
• facebook

Nambaran'ny Komity Mpanataneraka na ny “Comité Exécutif” eo anivon’ny FMF ny faran’ny herinandro teo, fa tsy misy fanampiana avy any amin'ny FIFA ny fanamboarana ny kianjaben'i Mahamasina na ny Kianja Barea.

Ny fanjakana Malagasy no miantoka manontolo ny lany, 77 tapitrisa dolara na manodidina ny 277 miliara ariary eo raha ny resaka tany am-piandohana no tetibidin'ny asa. Amin’ny lafiny iray, dia karazana serasera io hoentina mandoka sy milaza fa miasa sy manam-piniavana ny Fanjakana na tsy misy aza ny tohana avy amin’ny FIFA, manam-bola,… Manana 77 tapitrisa dolara laniana amina kianja kanefa mitaloha amin’ny Tahirim-bola Iraisam-porenena (FMI) ka ny 27 agositra no nilazan’ny FMI fa nangataka ny hamenoana ny fanampiana “Facilité de Crédit Rapide” na FCR i Madagasikara. Nambaran’ny Praiminisitra Ntsay Christian fa haompana any amin’ny fandoavana ny karaman’ny mpiasam-panjakana sy hampiodinan-draharaha ny ankamaroan’ny fanampiana iraisam-pirenena. Aiza, hoy izy tamin’izany ny handoavana an’ireo? Ny vahoaka very asa etsy ankilany, ny orinasa sahirana tanteraka tsy misy mpiahy fa rehefa hitaky trosa maika ery ny mpitondra,… Nahavita izay vitany ho an’ireo very asa sy orinasa sahirana ny 77 tapitrisa dolara, raha tena nampiasaina amina sehatra mamokatra. Marina fa velirano angamba io, kanefa tsy ny kianja no ratsy fa ny tsy fahasahiana manapa-kevitra hoe ity aloha no laharam-pahamehana izao, fa ity ajanona kely, dia tohizana rehefa metimety fiainana ara-tsosialy. Izay tokoa angamba ilay hoe izahay aloha no eto dia izay tianay ihany io ?

Toky R

Tia Tanindrazana

Samia mijoro ho an'i Gasikara.