Kenji-Van Boto

Hifindra ao Suisse

Sport
Zoma 05 Jolay 2024

Raha atotaly dia miisa 138 ireo lalao niarahan’ilay vodilaharana malagasy eo amin’ny taranja baolina kitra,

Kenji-Van Boto, niaraka tamin’ny klioba frantsay AJ Auxerre. Tao anatin’ny fifaninanam-pirenena ho an’ny divizionina faharoa na «Ligue 2» ny 136 tamin’ireo ary divizionina voalohany na «Ligue 1» kosa ny 2. Hitodi-doha any Soisa indray ankehitriny ity mpilalao ity ary azo ambara ho niakatra hatrany ny lentany satria dia ny FC Sion, divizionina voalohany soisa, indray izany izao no hiara-dalana aminy taorian’ny nandalovany tao amin’ny Pau FC, klioba frantsay, divizionina faharoa, nilalaovany farany. 28 taona moa ankehitriny ny lehilahy. Mirefy 1,83 metatra. Efa ela ity ekipa soisa ity no naniry hanana an’i Kenji ary ankoatran’ity ekipa manana ny lazany any an-toerana ity dia efa nikitika azy ihany koa ny divizionina voalohany belza, Anderlecht, ny taona 2022. Teo amin’ny resaka fampindramana sy fakana azy ho mpilalao raikitra tao amin’io klioba io kosa tamin’izay fotoana izay, raha tsiahivina, no nipetrahan’ny fisalasalana. Ankehitriny izany aloha dia manana vodilaharana mivoatra any amin’ny fifaninanam-pirenena voalohany ao Soisa indray isika ary hirariana mba hampivoatra ny aavo tekinika sy lentan’ny ekipam-pirenena malagasy na ny Barean’i Madagasikara koa izany. Raha tsy dia sanatria hoe tsy ho voaantso indray angamba ity rindrimbe ity.
J. Mirija