Sport

Partagé sur :
• facebook

Efa milamina ny momba ny kianjan’i Barikadimy handraisana ny lalaon’ny ekipam-pirenen’i Cote d’ivoire sy Madagasikara amin’ny 14 novambra izao, hoy

ny tompon’andraikitry ny seraseran’ny federasionina malagasin’ny baolina kitra, Jocelin Razafimamonjy omaly. Ilaina marihina foana fa ny 30%n’ireo mpijery zakan’ny kianja ihany, izany hoe, eo amin’ny 5000 isa eo no afaka manatrika izany. Tafiditra ao anatin’izay ny mpilalao sy ireo ofisialin’ny lalao toy ny kaomiseran’ny lalao, ny resaka fandriampahalemana, ny mpilatsaka an-tsitrapo sy ny rehetra. Araka ny fangatahan’ny mpanazatra, Nicolas Dupuis, ihany koa dia mba hampidirina anaty arofenitry ny fahasalamana ny fisiana fanazarantena iarahan’ireo mpilalao 25 mirahalahy voaantso ary mba ho in-dray mandeha fara faharatsiny hizarana amin’izay fanotronana tsy misy afa-tsy 30% izay. Lalao goavana ary iankinan’ny fahazoantsika ny tapakila hiatrehana ny CAN 2022 ny lalao amin’ny novambra, hoy hatrany ny fanazavany. Miezaka sy miara-miasa akaiky noho izany ny mpanazatra sy ny FMF ary ny minisitera hanao izay hahatomombana an’io. Tsy misy ny olana, hoy izy, fa ny komity mpanatanteraka eo anivon’ny federasionina dia miray saina amin’ireo voalaza ireo. Tsy afaka ny hahazo lalao ara-pirahalahiana ankoatr’ireny miisa 2 efa vita ireny moa isika, hoy izy, satria efa mikatona ny fahafaha-manao izay hatramin’ny taona ho avy ka noho izany dia lalao ofisialy avokoa indray aloha no tokony hifanjohy manaraka eo, hoy hatrany ny fanazavana.

J. Mirija

Tia Tanindrazana

Samia mijoro ho an'i Gasikara.