Hazakazaka 100m, Meeting Régional, Frantsa

Laharana faharoa i Claudine Nomenjanahary

Sport
Talata 01 Jolay 2025

Namiratra i Claudine Nomenjanahary, mpihazakazaka malagasy eo amin’ny alavirana 100 metatra,

sokajy vehivavy, ny faran’ny herinandro teo tany Frantsa. Nisongadina ny vehivavy nandritry ny Meeting Régional an’i CAC izay natao ny sabotsy 28 jona teo tao amin’ny kianjan’i Hélitas ao Caen, raha ny angom-baovao voaray omaly. Nahavita fe-potoana tsara indrindra na «record» ihany koa izy tao anatin’izany raha nahatanteraka ny fihazakazahany tao anatin’ny 11.43 segaondra nanoloana ilay frantsay Khadijah Cherifou (11.72). Mbola montsany aza io zava-bita tsara indrindrany io mba hahazoana ny medaly volamena tamin’ny famaranana tao anatin’ny 11.36 segaondra. Novereziny lavitra daholo na ilay kaongoley Natacha Ngoye (11.71) na ilay frantsay Jeanne Vannier (11.74). Efa nahavelom-bolo toy izany koa ny zava-bitan’i Claudine Njarasoa ny zoma 27 jona nandritry ny «39e Meeting International de Montgeron-Essonne» tao amin’ny kianja Pierre de Coubertin. Teo amin’ny laharana faharoa na izany aza no niafaràn’ny solontena malagasy raha toa ka ilay ivoarianina Maboundoy Koné kosa no nahazo ny medaly volamena tao anatin’ny fe-potoana 11.24 segaondra, raha ny angom-baovao voaray hatrany momba izay hazakazaka 100 metatra izay.
Nangonin’i J. Mirija