Sport

France # Croatie Lasa resaka politika

Sport
Zoma 13 Jolay 2018

Mifantoka tanteraka amin’ny lalao famaranana ny mondial 2018 ho tanterahana ny alahady 15 jolay ho avy izao ny ankamaroan’ny sain’ny Malagasy .Misy ny manana fomba fijery amin’ny lafiny fanatanjahantena fa misy ihany koa no manana fomba fijery politika.

Amin’ny toe-draharaha politika nifandimby teto amintsika mantsy dia maro ny Malagasy no tsy dia mankasitraka ny Frantsay izay azo lazaina fa miditra tanteraka amin’ny politika Malagasy sy ny afrikanina amin’ny ankapobeny. Raha tsy hilaza afa-tsy ny fampiantranoana an’i Andry Rajoelina tamin’ireny krizy 2009 ireny fotsiny aza. Izany no mahatonga ny Malagasy sasantsasany tsy maka ny ekipa frantsay tsotra izao. Na iza na iza ekipa mifanandrina aminy dia aleon’ny Malagasy sasany maka ny ekipa hafa. Maro koa no manome tsiny fa ny 90%-n’ny mpilalao Frantsay dia kintana mamiratra avy aty amin'ireo firenena Afrikana nozanahany avokoa. Midika ve izany fa ireo mpilalao baolina kitra avy amin’ny zanatany fahiny dia trandrahan’ny reny Malala arak’izay azony atao ihany koa ? Nahoana tokoa moa no izy irery no firenena manerantany ka ny antsasa-manila mahery amin’ ireo mpilalao amin’ny ekipam-pirennena dia tsy tena avy ao aminy ? Tsy sanatria manakiana na manaratsy fa fandinihina fotsiny ihany. Etsy an-daniny kosa anefa dia mahafaly fa azo lazaina fa ny ekipam-pirenena Frantsay no ekipa afrikana tafita ary mety hibata ny amboara eran-tany amin’ity 2018 ity.