Sport

Foara Kanton’i Gasikara andiany voalohany Hanomboka rahampitso etsy Antaninarenina

Sport
Talata 21 Mey 2019

Hanandratana ny vita Malagasy dia hotanterahina etsy amin’ny zaridainan’Antaninarenina mandritra ny 5 andro (21-25 mey 2019) ny varotra fampirantiana Kanton’i Gasikara andiany voalohany karakarain’ny Chez’Elles Madagascar tarihan’ny filohany, Ratrimoson Mihanta Stéphanie,

eo ambany fiahian’ny minisiteran’ny indostria sy ny varotra ary ny asa tanana Malagasy sy ny Ortana « Office du Tourisme Antananarivo ». Tranoheva 30 mahery kely no hampiranty sy hivarotra ny asa tanana vita Malagasy toy ny zaitra, sokitra, firavaka … hatramin’ny sakafo Malagasy, manaraka kalitao avo lenta amin’ity andiany voalohany eto Antananarivo ity. Kasaina hatao isaky ny 3 volana ny hetsika, hoy Rtoa Mihanta Stéphanie, ary hasandrahaka manerana an’i Madagasikara any aoriana. Miankian amintsika Malagasy ihany ny fampiroboroboana ny asa tanana Malagasy, hoy ny Tale jeneralin’ny asa tanana, Audace Kaoaly, tamin’ny fitafana tamin’ny mpanao gazety tetsy Antaninarenina omaly.

Ntsoavina Evariste