Sport

FMF-AJESAIA Vola aloha izay vao mivoaka ny �Certificat de transfert�

Sport
Alarobia 19 Mey 2010

Tsy nivalona fa mbola nitohy ny tantara mikasika ilay lalao miverin’ny AJESAIA sy ny USS Tamponnaise tetsy Mahamasina, tafiditra tamin’ny fiadiana ny tompondakan’i Afrika ho an’ireo klioba, volana vitsy lasa izay, izay niafara tamin’ny disadisa noho ny toraka tavoahangy nataon’ireo mpijery. Tsiahivina araka ny nanambaran’ny filoha lefitry ny federasiona, Andriamiasasoa Doda tamin’ireny fotoana ireny, raha mbola tsy nilatsaka akory ny sazy ary mbola namafisin’ity farany tamin’ny fampahalalam-baovao maro fa “ny federasiona no mizaka sy manefa ny sazy na dia ny klioba aza no tompomarika tamin’ny fikarakarana ireny lalao ireny”. Heno anefa fa “notakian’ny federasiona amin’ny AJESAIA indray ny fanefana io sazy izay mitentina 5000 dolara io raha tsy izany tsy mahazo ny taratasy fanomezan-dalana hifindra klioba ireo mpilalaon’Antaninkatsaka handeha hila ravinahitra any ivelany”. Ny sabotsy teo no fantatra fa nanefa ny antsasak’io vola io ity klioba tompondakan’i Madagasikara ity. Tsy maintsy aloa afaka tapa-bolana indray farafahatarany ny ampahany ambiny. Lasa soa aman-tsara ihany moa ireo mpilalaon’ny AJESAIA roa lahy dia i Sedera any amin’ny klioban’i Petite Ile sy Bolida any amin’ny St Paul, samy any La Réunion. Tsy mety hilamina mihitsy ity kitra ity raha mba somary efa nangingina kely herinandro vitsy izay ireo disadisa samihafa.

Hery Rabe