Sport

Fitsinjovana ny fanatanjahantena Mahery am-boalohany ny fanjakana

Sport
Alakamisy 11 Aogositra 2016

Manana mpanao fanatanjahantena maro efa nitondra avo ny voninahi-pirenena i Madagasikara saingy toy ny afo mololo ny fitsinjovan�ny fanjakana ireny olona ireny.

Any am-piandohana ihany no misy ny fanolorana mari-pankasitrahana izay tsy araky ny zava-bitan’ny olona iray izay nitondra avo ny ny fanevan’I Madagasikara tany ivelany akory. Maro ireo atleta, indrindra fa ny eo amin’ny taranjan’olon-tokana, no tsy re tsaika intsony kanefa fanta-daza teo amin’ny sehatra iraisam-pirenena, toa an-dry Séverain sy ry Lavakely izay efa samy nibata ny tompondaka eran-tany teo amin’ny taranja haiady. Tany am-piandohana ihany no nindraindraina ireny olona ireny fa taty aoriana dia miverina amin’ny fiainana mahazatra azy ihany noho tsy firaharahan’ny fanjakana. Nanamarika ny firenena sy ny fiandrianam-pirenena ny fananana mpanao fanatanjahantena mamiratra. Tsy izany anefa no zava-misy eto amintsika. Ho an’ny firenena efa fanta-daza, zava-dehibe ny fitsinjovana ny mpanao fanatanjantena toy ny fotodrafitrasa arifomba sy iraisana ho an’ny karazam-panatanjahatena rehetra mba hisian’ny firaisan-tsaina, fikarakarana mandavan-taona ireo atleta sy fanindraindrana azy ireo eo amin’ny firenena.

Toky R.