Sport

Partagé sur :
• facebook

Taorian’ny fanambarana nalefan’ny FIFA ny alatsinainy ny amin’ny hananganana tsy ho ela ny “Comités de normalisation” hitantana ny baolina kitra any amin’ny République dominicaine sy eto

Madagasikara dia nanatanteraka ny fialany tsy  hitantana intsony ny  federasion’ny baolina kitra Malagasy Atoa Doda Andriamiasasoa. Nambarany ofisialy teo imason’ny mpanao gazety teny Isoraka izany omaly talata 13 novambra 2018. Herintaona sy tapany izay no nitantanako vonjimaika an’ity FMF ity, hoy izy, ka hisaorako etoana ny mpiara-miasa tamiko rehetra teto anivon’ny Federasiona sy ny mpikambana CE Football “Comité Exécutif” rehetra ato anatiny  ary ianareo namana mpanao gazety rehetra sy ny mpitia baolina Malagasy manontolo tamin’ny fifanampiana matotra nisy ka nahazoana ny vokatra niandrasana nandritra ny 50 taona katroka dia ny fahatafitana ho any amin’ny CAN. Ambarako etoana fa mahazo milaza ny filazany avokoa izay te haneho hevitra rehetra fa ny azoko ambara dia vokatry ny ezaka nataon’ny FMF marindrano  no nahatonga ny fahombiazana izay hisaorako manokana an’ireo mpilalao sy mpanazatra nanao ny ainy tsy ho zavatra nahatontosa izany ary hisaorana ihany koa ny fanampiana nentin’ny tsirairay avy. Ho fampiharana ny fanambarana nataon’ny FIFA dia ambarako fa ny SG mpisolo toerana am-perinasa, Rtoa Sarindra Randrianasolo no hitantana vonimaika ny FMF  mandra-pahatongan’ireo iraky ny FIFA sy CAF hanatanteraka ny fanendrena an’ireo mpikambana ho ao amin’ny “Comité de normalisation Madagascar” hitantana azy sy hikarakara ny fifidianana hatao ao anatiny. Ambarako fa efa vitanay kalamina talohan’izao zava-misy izao ny amin’ny handraisantsika an’ireo lalao hotanterahina eto an-tanindrazana sy ny hivahinianana any ivelany handraisan’ny Cnaps Sport, Elgeco Plus ary Barea anjara, ary koa ny handraisantsika anjara amin’ny Beach Soccer aty ka hiaingan’ireo mpilalaontsika ho any Egypte amin’ny 9 desambra 2018 izao.

Mikasika ny mety ho mbola haha kandida ahy  ho filohan’ny FMF, hoy Atoa Doda Andriamiasasoa dia mbola aloha loatra ny firesahana izany ankehitriny fa ho hitantsika eo ihany.

Ntsoavina Evariste

Tia Tanindrazana

Samia mijoro ho an'i Gasikara.