Sport

Partagé sur :
• facebook

Nambaran’ny filohan’ny ligin’ny rugby eto Analamanga, Ravelojaona Andry La Pie, omaly tetsy amin’ny Malacam Antanimena fa ligim-paritr’ity taranja ity miisa 9 amin’ireo 13 misy no mangataka ny fialan’ny filohan’ny Malagasy Rugby,

Rakotomalala Marcel, amin’ny toerany araka ny taratasy nalefan’izy ireo efa tamin’ny 24 febroary 2018 tany amin’ny minisitry ny fanatanjahantena, Andriamosarisoa Jean Anicet sy tany amin’ny filohan’ny COM, Siteny Andrianasoloniaiko ary tany amin’ny filohan’ny sport fédérale, Rosa Rakotozafy. Ny antony hoy izy dia tsy misy firaharahiana anay ligim-paritry ny rugby manerana ny nosy ataon’ny federasiona tarihan’ity filoha ity fa tsy nisy nahazo ny fanampiana tokony homena anay ligy hoenti-mampandroso ny tontolo izahay, eo koa ny fampanantenana poakaty nataony hanomezana fitaovana maro samihafa toy ny baolina sns… ny tsy nanatanterahan’ny federasiona fifaninanam-pirenena tamin’ny 2016 sy 2017 ary tamin’ity 2018 ity aza dia nisy ligim-paritra 5 tsy nantsoiny handray anjara tamin’ny Championnat tandrametaka nataony, farany tsy nisy ny tatitra ara-moraly sy ara-teknika ary ara-bola nataon’ny FMR hatramin’izay taona nitantanany izay. Nanao sonia ny fangataham-pialany ireto filohan’ny ligim-paritra manaraka ireto : Fiankinana Anthonny Christopher (Diana), Rakotozafy Armand Gervais (Amoron’i Mania), Rakotoarison Jhonson Joachim (Matsiatra Ambony), Ravaolahy Patrice (Ihorombe), Rakotomalala Miantatsoa Frédéric (Vakinankaratra), Ravelojaona Andry (Analamanga), Ramanantsoa Eric (Atsinanana), Kapity Eric (Itasy) ary Dimbiarisoa José (Bongolava).

Ntsoavina Evariste

Tia Tanindrazana

Samia mijoro ho an'i Gasikara.