Sport

Filohan’ny FMF vaovao Malalaka tsara amin’ny fitantanana

Sport
Talata 27 Aogositra 2019

Malalaka tsara amin'ny fitantanana ny FMF ny filoha vaovaon’ity federasionina malagasin’ny baolina kitra ity, Arizaka Raoul Rabekoto Romain, raha ny fahitan’ny mpitia baolina kitra ny andraikitra arak’asa sy politika sahaniny no jerena.

Tsy mitazona andraiki-panjakana ambony intsony izy, tsy mpikambana amin'ny antoko politika ary tsy olom-boafidy ihany koa. Inoana fa hanam-potoana tsara amin'ny fikarakarana ny kitra Malagasy, indrindra amin'ny fanatanterahana ny fampanantenana nataony hitantana ny federasiona. Mavesatra na izany aza ny asa miandry azy eo amin'ny sehatra iraisam-pirenena satria higadona sahady ity ny septambra hanomanana sy hiatrehana ireo lalao iraisam-pirenena goavana sy salantsalany toy ny tompondaka eran-tany, ny CAN, ny CHAN, ny COSAFA ka hatramin'ny lalaon’ny nosy afaka efatra taona, raha tsy hiresaka ankoatra ny ekipam-pirenena. Eo koa ireo fifaninanana iraisam-pirena andraisana klioba anjara toy ny amboaran’ireo ekipa tompondaka sy ny amboaran’ny CAF. Ny fanatsarana tokony hatao eto an-toerana toy ny kianja, ny fifaninanam-pirenena, ny famokarana mpandimby, ny fanomezana traikefa ireo mpitsara sy ny hafa rehetra.

J. Mirija