Sport

Fikambanana JSE Nankasitraka ny ben’ny tanàna Lalao Ravalomanana

Sport
Zoma 05 Aprily 2019

Nanolotra amboara lehibe ho an’ny ben’ny tanànan’Antananarivo-Renivohitra (CUA), Lalao Ravalomanana, vokatry ny fanampian’ity farany ny lalao ara-panatanjahantena Foot à 11 nokarakarainy ny fikambanana JSE « Jeunes Sports Events »tamin’ny 25 -31 martsa lasa teo, izay notanterahana tetsy amin’ny kianjan’i Mahamasina.

Tonga tao amin’ny Lapan’ny tanàna Analakely ny solontenan’izy ireo naneho fankasitrahana tamin’ny alalan’ny fanolorana an’io amboara lehibe io. Ny filoha mpanorina ny JSE Andriamisa Vania sy ny lefiny Rakotondravony Tsitohaina ary Andriamihanta, izay samy tanora avokoa no nitondra ny fankasitrahana satria tsy tontosa io lalao ara-panatanjahantena Foot à 11 io raha tsy teo ny fanomezan-tanan’ny Ben’ny tanàna Lalao Ravalomanana. Marihana fa nisy ekipa 15 ireo nandray anjara nandritra ity fifanintsanana andiany voalohany ity ary ankoatra izay dia mbola manana tanjona hanampy ny sahirana sy ny zaza kamboty koa ny JSE, fikambanana vao niforona ny 11 jona 2018 lasa teo.

Ntsoavina Evariste