Sport

Fifidianana ho filohan’ny FMF vaovao Ny tsara toerana amin’ireo akaiky an’i Ahmad

Sport
Alatsinainy 23 Oktobra 2017

Efa mandeha sahady ny tombantombana samihafa ho an’izay olona tena hisolo tanteraka ny toeran’i Ahmad taorian’ny datin’ny sabotsy 14 oktobra teo nivoahan’ny daty hanatanterahana an’ireo fifidianana amin’ny fitantanana ireo rafitra hitantana ny baolina kitra Malagasy.

Be ireo izay efa nandefa feo tetsy sy teroa fa hilatsaka handray anjara amin’io fifidianana ho filohan’ny FMF amin’ny 10 martsa 2018 io. Maro koa anefa no mieritreritra fa ireo olona tena akaiky an’ny filoha teo aloha izay lasa filohan’ny CAF no manana herijika kokoa handrombaka ny toerana. Eo izany ny filoha vonjimaikan’ny FMF am-perinasa, Doda Andriamiasasoa, eo koa ny SG-n’ny FMF, Rakotomalala Stanislas ary eo farany ny filoha lefitry ny FMF, Arizaka Rabekoto Raoul. Ity farany anefa no heverin’ny maro fa mety hitondra fiovana betsaka eo amin’ny tontolon’ny baolina kitra Malagasy noho ny zava-bitany nivaingana tsy ela akory teo amin’ny fananganana fotodrafitrasa tsy miankina ilain’ny kitra ankehitriny miampy ny traikefa efa nentiny teo anivon’ny FMF ary manginy fotsiny ny fahitana ny tena fankamamiany an’ity taranja ity. Ho hita eo ny tohiny.

Ntsoavina Evariste