Sport

Fifidianana filoha vaovaon’ny FMF Amin’ny volana septambra 2019

Sport
Alatsinainy 08 Aprily 2019

Notontosaina teny amin'ny Hôtel Paon d'Or Ivato Antananarivo tamin’ny sabotsy 6 aprily tontolo andro teo ny AG « Assemblée Générale Extraordinaire » an'ny FMF « Fédération Malagasy de Foot-ball » tantanan’ny CN

« Comité de Normalisation » vonjimaika ankehitriny natrehin’ny minisiteran’ny fanatanjahantena sy ny komity olimpika Malagasy hatramin’ny farany. Fehin-kevitra nifanarahana no nivoaka mba hahazoana manaraka an’ireo toromarika nomen’ny FIFA sy hampiharana ny filan’ny baolina kitra eto an-toerana. Tapaka fa nomen’ireo ligy 21 fahefana ny CNFMF hitantana ny famerenana ny fifidianana any amin’ny ligin’ny baolina kitra Bongolava sy any amin’ny seksion’ny baolina kitra Tsiroanomandidy hatramin’ny tapaky ny volana mey 2019 raha ela indrindra. Mbola nomen’ireto ligy mpanapa-kevitry ny fivoriambe ireto fahefana ihany koa ny CNFMF hanolotra volavolana sata vaovao na fanitsiana hifehy ny FMF sy volavolan-dalàna vaovao ihany koa hifehy ny fifidianana rafitra baolina kitra Malagasy « code électoral » mba hifanaraka amin’ireo lalàna vaovao navoakan’ny FIFA sy CAF tamin’ny 2015 sy 2017. Nambaran-dRtoa Atallah Béatrice filohan’ny CNFMF teo am-pamaranana fa niaiky ny rehetra fa tsy ho vita alohan’ny 12 mey ny fifidianana izay ho filoha vaovaon’ny FMF. Heverina hotanterahina any amin’ny volana septambra 2019 izy io ka efa hampahafantariny ny FIFA izany.

Ntsoavina Evariste