Sport

Fifanintsanan’ny «Ligue des champions» Misy herijika ny klioban’i Loïc Lapoussin

Sport
Alakamisy 04 Aogositra 2022

Manana herijika ho tafiakatra any amin’ny lalao sakana ahafahana miakatra amin’ny Ligue des champions any Eoropa ny Union Saint-Gilloise misy ilay mpilalao Malagasy Loïc Lapoussin.

Nandresy 2-0 ny Glasgow Rangers avy any Ecosse ity Klioba Belza ity ny alin’ny talata teo, baolina matin’ny kapiteny Teddy Teuma teo amin’ny minitra faha-27 sy an’i Dante Vanzeir teo amin’ny faha-76 minitra. Lalao izay tafiditra ao anatin’ny fihodinana fahatelo amin’ny fifanintsanana hiakarana amin’ny ligues des champions. Afaka herinandro latsaka eo ny lalao miverina hatao any Ecosse. Tsara ny manamarika fa tompon-toerana ary nilalao hatramin’ny farany i Loïc Lapoussin, ary nandray anjara betsaka tamin’ny fandresena azon’ny kliobany. Raha tafavoaka eo izy ireo, dia hifandona amin’izay mivoaka mpandresy amin’ny PSV Eindhoven sy ny AS Mnonaco, izay nisaraka 1-1 tamin’ny lalao mandroso. Tsiahivina fa tompondakan’ny divizionina faharoa any Belgique ny Union Saint-Gilloise talohan’ny taom-pilalaovana farany teo, niakatra ho divizionina voalohany tamin’ny taon-dasa, ary namiratra sy laharana faharoa avy hatrany tamin’ny taom-pilalaovana farany teo. Mitana ny laharana fahatelo vonjimaika izy ireo amin’izao fanombohan’ny taom-pilalaovana izao, raha toa ka faha-5 kosa ny Sporting Chaleroi misy an’i Marco Ilaimaharitra, izay vao avy resin-dry Lapoussin 1-0 dimy andro lasa izay.
Toky R