Sport

Fifanintsanana CAN 2021 Tsara toerana i Madagasikara

Sport
Alatsinainy 18 Novambra 2019

Nahazo isa 3 sahady ny Barean’i Madagasikara eo amin’ny fifanintsanam-bondrona CAN 2021, andro voalohany, rehefa nandresy ny Walya Etiopianina tamin’ny 1-0 tetsy amin’ny kianjan’i Mahamasina tamin’ny sabotsy 16 novambra 2019.

Baolina matin-dRaveloson Rayan teo amin’ny minitra faha-20 no niantoka an’io fandresen’ny Barea io. Tsy misy resaka maro azo tenenina afa-tsy ny hoe : nahavita ny adidiny ny Barea na nahazo fandresena ary tsara toerana ao amin’ny vondrona misy azy. Somary nitsitsy aina izany ireo mpilalao Malagasy raha vao nahatafiditra an’io baolina io satria rahampitso talata 19 novambra 2019 dia efa hihaona amin’ny Niger any Niger indray ry zareo. Omaly vao nangiran-dratsy dia efa nanainga hamonjy an’io firenena io ny andiany voalohany amin’ny mpilalaon’ny Barea ary omaly tolakandro kosa ny andiany faharoa. I Romain Metanir vodilaharana havia Malagasy kosa no azo lazaina fa “Homme du match” tamin’iny lalao tamin' ny sabotsy iny.

Ntsoavina Evariste