Fely sy Drogba

Partagé sur :
• facebook

Samy nandà tamin’ny ora farany ny fifindràna klioba atsy

Seychelles i Tsilavina Fanomezantsoa na Drogba sy i Fely, mpilalao baolina kitra malagasy, raha ny fampitam-baovao voaray ny faran’ny herinandro teo. I Drogba moa izay lohalahana eo anivon’ny Disciples FC, klioba divizionina voalohany eto Madagasikara, ary hijanona ao ihany izany fa tsy ho any amin’ny St Michel United atsy Seychelles, klioba nisy an’i El Hadary taloha, indray na dia efa tonga teto an-toerana mihitsy aza ireo solontenan’ity klioba atsy amin’ny nosy rahavavy ity. 3 andro taorian’izay koa dia nilaza ho tsy mazoto hifindra ao amin’ny Anse Reunion FC, klioba atsy Seychelles hatrany, i Fely, ilay namono ny baolina voalohany tafiditry ny malagasy tamin’ny famaranana ny tompondakan’i Afrika na Chan 2025 nanoloana an’i Maraoka farany teo. Efa voasoratra anatin’ny lisitry ny ekipa nefa ny tenany ary efa nisy ny fifanarahana teo amin’io klioba io sy ny Fosa Juniors, izay klioba nilalaovany farany teto Madagasikara, raha ny fampitàm-baovao voaray hatrany. Tsy mbola nisy sonia vita nefa, hoy i Fely. Manan-jo handà aho, hoy izy, satria tsy mbola nisy fifanarahana na «contrat» vita. Ny fifanarahan'ny samy mpitantana ny klioba 2 tonta tsy misy fantatro, hoy ny fanazavany. Raha ny fampitàm-baovao voaray avy amin’ireto klioba vahiny ireto kosa dia voambara fa ireto klioba vahiny ireto no nandà ireo mpilalao malagasy tamin’ny ora farany. Ny mampanahy ireo mpanara-baovao ara-panatanjahantena, indrindra, ireo mpankafy baolina kitra eto Madagasikara, etsy ankilan’izay, dia ny hoe ho raisin’ireo klioba vahiny ho tsy matotra ny mpilalao malagasy na ireo mpitantana ny kitra malagasy ka mety ho sanatria hisy fiantraikany amin’ny fifindràn’ireo mpilalao hafa any aoriana any.
Nangonin’i J. Mirija
 

Tia Tanindrazana

Samia mijoro ho an'i Gasikara.