Sport

Partagé sur :
• facebook

Mitady izay ho mpifanandrina aminy ny Barean’i Madagasikara tantanan’i Nicolas Dupuis eo anatrehan’ny fidirana amin’ny “fenêtre internationale” ny volana septambra izao ahafahana miatrika lalao ara-pirahalahiana hanomanana ny lalao kaontinantaly.

Foana mantsy hatreto ny lalao ara-pirahalahiana tokony hifanandrinana amin’I Zambie sy Lybie, raha ny fanambarana nataon’ny mpanazatra Nicolas Dupuis, araka ny notaterin’ny fampahalalam-baovao iray omaly. Noheverina hotanterahina tany Lybie ireo lalao ara-pirahalahiana miisa roa saika hotanterahina. Etsy ankilany, nanomboka ny herinandro lasa teo no nanao fivoriana teknika ny Federasionina tarihin’ny Filoha vonjimaika Victorien Andrianony. Ho an’ny federasionina, pitsopitsony maro no mila jerena amin’ny lalao ara-pirahalahiana hatao toy ny fahafaha-manatanteraka ny lalao, ny lentan’ny ekipa hifanandrinanana. Raha hanao lalao ara-pirahalahiana tokoa isika, dia mitady mpifanandrina mafy kokoa, ka lalao roa no heverina fa hatao hatreto, kanefa mety ho iray ihany koa arakaraka ny zava-misy. Isan’ny manampy an’I Madagasikara amin’ny fanomanana lalao ara-pirahalahiana ny Kaonfederasionina Afrikanina (CAF), ary efa nanolo-kevitra momba izay tokony ho mpifanandrina amintsika. Tsara hatrany ny manamarika sy mampahatsiahy, fa laharana fahaefatra vonjimaika ao anatin’ny Vondrona E isika amin’ny fifanintsanana hiakarana amin’ny CAN 2023 taorian’ny faharesena 3-0 nanoloana an’I Ghana tany Accra sy ny 1-1 tamin’I Angola tetsy Mahamasina. Ny 19 septambra 2022 raha tsy misy ny fiovana no handray an’i Centrafrique ho an’ny andro fahatelo, ary ny 27 septambra kosa ny lalao miverina any aminy, raha toa ka ny volana martsa 2023 kosa ny lalao miverina amin’I Ghana sy Angola.
Toky R
 

Tia Tanindrazana

Samia mijoro ho an'i Gasikara.