Sport

Fanokafana ny taom-pilalaovana ASIEF 2019 Ny « Grande Marche » no hanombohana azy

Sport
Zoma 05 Aprily 2019

Hosokafana ofisialy amin’ny sabotsy 06 aprily ho avy izao ny taom-pilalaovan’ny ASIEF « Association Sportive Interministérielle pour l'Entretien des Fonctionnaires ».

Ny diaben’ireo mpiasam-panjakana « Grande Marche » miainga eo amin’ny tranombokim-pirenena ny maraina mihazo ny kianja mitafon’i Mahamasina no hanombohana azy arahina hetsika fanentanana isan-tsokajiny sy kabary ataon’ny manampahefana isan-tsokajiny ary ahitana koa lalao fihantsiana « match de défi » basikety hifanandrinan’ny Santé sy ny Défense ary ny volley-Ball hikatrohan’ny Trésor sy Sénat. Hifandraika indrindra amin’ny fanamarihana ny « Journée Internationale du Sport au Service du developpement et de la Paix » izy ity. Hisy koa ny hetsika maromaro hokarakarain’ny minisiteran’ny tanora sy fanatanjahantena Malagasy ao anatiny. Nomarihan’Atoa Andrianarison Jean Aimé Botosera “Jhon Love” filoha am-perinasan’ny ASIEF fa miditra amin’ny fifaninanana karakarain-dry zareo amin’ity ankoatra an’ireo efa nisy hatramin’izay ny “belote”, kabary, “jeux d’échec”, fanorona, fifaninanana Vtt. Hisy koa ny fifaninanana “beach soccer” sy “volley beach” ary “hand beach” hampidirina amin’ny fifaninanana.

Ntsoavina Evariste