Sport

Fanilihana kandida-Ligy Baolina kitra Hiakatra any amin’ny FIFA ny raharaha

Sport
Sabotsy 02 Desambra 2017

Mihevitra ny hitaraina eo anivon’ny Federasionina iraisam-pirenena momba ny baolina kitra (FIFA) ireo filohan’ny Ligy izay mahatsapa fa nisy tsy rariny sy fanaparam-pahefana nataon’ilay CNE na

vaomieran’ny fifidianana eo anivon’ny federasionin’ny baolina kitra Malagasy. Nivoaka omaly tokoa mantsy ny lisitr’ireo olona azo fidiana ho filohan’ny ligy, nisy ireo voailika avy hatrany. Tafiditra tao, ohatra, i Giscard Andriano (Vatovavy Fitovinany) izay nambara fa tsy ara-dalàna ny fomba nametrahany ny antontan-taratasy filatsahan-kofidiany. Voailika koa i Mamany Gan (Matsiatra Ambony) satria nolazaina fa tsy ampy ilay « attestation d’activités » ny dosie nateriny. Tsy nekena ihany koa ny filatsahan-kofidian’i Raherisoa ho an’ny ligy Atsimo andrefana satria nolazaina fa tara. Kandida fahefatra voailika noho ny antony mbola manjavozavo ihany koa i Joro, filohan’ny seksionina Tsiroanomandidy ho an’ny ligy Bongolava. Misy ny zavatra maro manjavozavo ka izany no hampiakarana ny raharaha eo anivon’ny FIFA mihitsy, hoy ireto kandida voailika ireto. Amin’izy ireo dia efa tafiditra ao anaty kajy hampandresena kandida iray amin’ny fifidianana filohan’ny federasiona amin’ny martsa 2018 izao fihetsika izao.

RTT