Sport

Fanatanjahantena Azo avadika ho fandraharahana

Sport
Talata 01 Oktobra 2019

Tanora misehatra amin’ny fanatanjahantena miisa 60 no mandray anjara amin’ny fampiofanana karakarain’ny “La maison de sport” mandritra ny herinandro.

Fampiofanana mahakasika ny fitantanana tetikasa sy fotodrafitrasa, famoronana orinasa, ny haivarotra sy serasera sy ny maro hafa no hotanterahina nanomboka omaly hatramin’ny zoma ho avy izao. Tanjona ny tsy hijanonan’ireo mpanao fanatanjahantena eny ambony kianja fotsiny fa avadika asa hamelomana tena izany ary ahafahana manome asa ny hafa mihitsy aza. Ho fampivoarana ny fanatanjahantena Malagasy dia miresaka mivantana amin’ny mpanao fanatanjahantena mihitsy ny enivon’ny “maison de sport” mandresy lahatra azy ireo handray fampiofanana amin’ny tontolon’ny fandraharahana. Ity fiofanana voalohany ity tontosaina eto Analamanga, Bongolava ary Itasy. Boeny sy Betsiboka kosa no hanaovana ny fiofanana faharoa ary hiverina eto Antananarivo ny fahatelo noho ny hamaroan’ny mpisoratra anarana. Maro be ireo mpampiofana ka anisan’izany ny mpanao gazety ara-panatanjahantena, ny tompon’andraikitra eo anivon’ny fiahiana ara-tsosialy (CNAPS). Ny maraina dia hatokana ho amin’ny fampiofanana fa isaky ny hariva kosa no hanatanterahana ny fidinana eny amin’ireo kianja ary hijerena ny fitantanana sy ny fandraharahana azo atao.

Tsirinasolo