Sport

Famaranana « Telma Coupe de Madagascar » Ny Elgeco Plus no hifandona amin’ny As Adema

Sport
Alarobia 03 Oktobra 2018

Fifanandrinan’ny samy ekipan’Analamanga ny lalao famaranana « Telma Coupe de Madagascar 2018 » hotanterahina etsy amin’ny kianjan’i Mahamasina amin’ny alahady 7 oktobra ho avy izao.

Resin’ny Elgeco Plus Analamanga tamin’ny 2-1 ny Cnaps Sport Itasy omaly tetsy Mahamasina teo amin’ny fandakana ny « tirs au but »-n’ny lalao manasa-dalan’ity fifaninanana ity izay tsy notanterahana ny alahady 30 septambra teo noho ny hamaizinan’ny andro. « Na dia tsy dia fahita maneran-tany aza izany hoe tirs au but izany fotsiny no haverina amin’ny tranga tahaka izao fa ny lalao manontolo mihitsy dia nanaiky ny hanatanteraka an’izany izahay, hoy Randriamanampisoa Alfred filohan’ny Elgeco Plus, satria izahay no nangataka ny hanemorana ny fanaovana an’io tirs au but io. Noporofoinay teto Mahamasina fa tena vonona ary niomana tamin’ity tirs au but ity izahay ka nahazo an’izao vokatra tsara izao. Voalazan’ny Baiboly, hoy izy, fa izay voasoratra dia voasoratra. Tsy hataonay kitoatoa ny fanomanana ny lalao famaranana hihaonana amin’ny As Adema ka mitohy ny « mise au vert » ho an’ireo mpilalaonay ary tsy maintsy hamboniana koa ny « morale » ho azy ireo.

Ntsoavina Evariste