Sport

Dominique Castano Tsara trandrahana ho Barea dieny izao

Sport
Talata 01 Septambra 2020

Feno 18 taona ny 12 novambra 2002 izao ilay Irakiraka havia milalao ao amin’ny Atletico Madrid, sokajy U 19, Dominique Castano.

Teto Antananarivo izy no teraka ary manana ra Malagasy na dia mizaka zo Espaniola aza hatreto. Na dia somary mbola kelikely vatana aza ity zandrikely ity dia mampiavaka azy ny fananany teknika ambony kokoa raha oharina amin'ny salan-taonany. Eo ihany koa ny fahaizany sy ny fahitany ny lalao amin'ny fotoana tsara tokony hizarany na handraisany ny baolina. Mpilalao baolina tena mitsoridriaka izy ary tena poizina kely ho an'ireo mpifanandrina aminy raha ny nambaran'ireo teknisiana nitily azy hiditra ao amin’ity klioba fanta-daza ity. Tsara trandrahana handrafitra ny ekipam-pirenena Malagasin’ny baolina kitra na Barea dien’izao noho izany ity ranamana ity satria tena hita fa tokony hanana hoavy mamiratra.

J. Mirija