Sport

Doda Andriamiasasoa filohan’ny FMF teo aloha Kandida tsara toerana ho PAM vaovao

Sport
Alatsinainy 17 Jona 2019

Kandida maromaro nirotsaka ho filohan’ny FMF “Federasiona Malagasin’ny Baolina kitra” tamin’ny taona 2018 lasa teo no tsara toerana eo amin’ny vokatra vonjimaikan’ny fifidianana solombavambahoaka 2019 navoakan’ny Ceni tamin’ny sabotsy 15 jona 2019.

Ao ny kandida Rakotomamonjy Nepatraiky Andre tao amin’ny distrikan’i Ihosy avy amin’ny tsy miankina nahazo salan’isa 30.60%, ny kandida Randriamanampisoa Alfred tao amin’ny distrikan’Antsirabe faha-2 nahazo ny salan’isa 40,60% ary ny kandida Andriamiasasoa Doda Nirimboavonjy tao amin’ny distrikan’i Manjakandriana avy amin’ny IRD nahazo salan’isa 36.21%. Raha io vokatra vonjimaika io, hahazo toerana miisa 84 eny Tsimbazaza amin’ny toerana 151 misy ny IRD manoloana ireo nifanandrina taminy izay 46 isa no toerana azon’ny tsy miankina ary toerana 16 no azon’ny Tiako i Madagasikara nanaraka azy. Raha ny lojikan-javatra dia ny IRD no hahazo ny maro an’isa ao amin’ity Antenimieram-pirenena ity. Mety ho azo antoka ny handrombahany ny toerana ho PAM “Filohan’ny Antenimieram-pirenena” ho avy ka tsara toerana ny kandida Andriamiasasoa Doda (Manjakandriana) noho izy efa zatra nifandray sy nitantana an’ireo filohana ligin’ny baolina kitra miisa 22 misy eto Madagasikara izay fantatra fa samy hafa firehana avokoa.

Ntsoavina Evariste