Depiote Todisoa Andriamampandry

Nanolotra omby 3 sy ondry 8 teny Anosibe Zaivola

Sport
Alatsinainy 23 Septambra 2024

Nitora-jofo indray ny kianja Todisoa etsy Anosibe Zaivola Ambohimanarina ny faran’ny herinandro teo.

Ambohipihaonan’ireo mpilalao baolina kitra na tanora na ireo efa zokinjokiny teny an-toerana, ankoatra ireo vahoaka tsy tambo isaina izay sady niala voly no nanohana. Nafana hatrany ny ady baolina kitra fanao eny an-toerana izay niditra indray tamin’ny dingana famaranana, ka toy ny mahazatra dia tonga nanolotra omby lehibe miisa 3 sy ondry miisa 8 ho an’ireo mpilalao sokajy tanora sy « vétérans » tafavoaka mpandresy sy mendritra tao anatin’ny fifaninana ny depiote Todisoa Andriamampandry. « Manohana hatrany ny mpanao fanantajahan-tena, hitaizana vatana mba ho salama tsara sy hahazoana saina matsilo, mba ialana koa amin’ny zava-mahadomelima ary mba ho fialam-boly ho an'ny rehetra », hoy io solombavambahoaka io. Tsy vao sambany fa efa fanaon’ity depiote ity moa ny tahaka izao ho anjara biriky hanohanana ny mpanao sy mpitia fanatanjahantena. Ampahany ihany koa amin’ireo asa sosialy fanaony, ary saika mahazo ny anjarany avokoa ny sokajy rehetra. Fomba firesak’ity depiote ity matetika rahateo ny hoe : tsy misy manana ny ampy fa sambatra izay mifanampy.
Toky R