Sport

Partagé sur :
• facebook

Toamasina no mandray ny « tournoi coupe du président 2015 zone centre », misy ny faritra Analamanga, Atsinanana, Analanjirofo ary Alaotra Mangoro, eo amin’ny taranja basket-ball, izay nanomboka ny sabotsy 14 martsa teo ary tsy hifarana raha tsy ny 22 martsa izao

. Na efa nanomboka tamin’ny sabotsy aza ny fifaninanana teo amin’ireo ekipa 16 mandray anjara nozaraina vondrona efatra, dia omaly alahady vao natao ny fanokafana izany tamin’ny fomba ofisialy, izay natrehan’ny sekreteram-panjakana misahana ny zandarimariam-pirenena Jly Paza Didier Gerard. « Nentina ampisongadinana ny talentan’ny tanora malagasy no nanaovana izao fifaninanana izao. Natao ihany koa mba handraisan’ireo ekipa tsy mpiatrika lalao eo amin’ny sehatra nasionaly », hoy ireo mpikarakara ity lalao ao Toamasina ity. Manana ekipa maro mandray anjara amin’izao lalao izao ny ligin’ny basket-ball atsinanana, ahitana ny ASCUT – SQUAD – HKML – 3FB ary ny MEGA INFORMATIQUE. Manaraka azy Analamanga izay nitondra ekipa 4 ahitana ny FANDREFIALA – DBC – FBC – LUCADRO. Manana ekipa roa avy kosa Analanjirofo sy Alaotra Mangoro. Mifandrimbona amin’izao lalao ao Toamasina izao ny federasiona ny basket-ball Malagasy, ny Telma, ny minisiteran’ny Indostria sy fampiroboroboana ny sehatra tsy miankina, ny minisiteran’ny paositra sy ny fifandraisan-davitra, ny minisiteran’ny tanora sy fanatanjahantena, ary ny minisiteran’ny fanabeazam-pirenena.

Rakoutou

Tia Tanindrazana

Samia mijoro ho an'i Gasikara.