Cosafa senior Women’s Championship 2024

Partagé sur :
• facebook

Raha somary rendrika sy mitotongana ny Barea sokajy lehilahy izay nosongonan’i Comores eo amin’ny filaharana

maneran-tany sy aty Afrika, dia nahavelom-bola kosa ny vokatra azon’ny Barea sokajy vehivavy omaly teo amin’ny Cosafa senior Women’s Championship 2024 tanterahana any Afrika Atsimo. Nomontsanin’i Madagasikara tamin’ny isa mavesatra 5-1 mantsy i Maurice omaly tao amin’ny kianjan’i Wolfson Stadium. Vokany, mitana ny laharana voalohany vonjimaika ao amin’ny Vondrona B izay ahitana an’i Botswana, Malawi, ary Maurice isika hatreto. Ny 26 oktobra isika no hifandona indray amin’i Malawi ary ny 28 okotobra no hifampitady amin’i Botswana. Izay voalohany isam-bondrona no tafakatra avy hatrany amin’ny manasa-dalana. Isan ‘ny nampiavaka ny Barea vehivavy tamin’ity endriny ity ny fiantsoana ireo mpilalao matihanina maromaro avy any ivelany raha somary nionona kokoa tamin’ny toto tànana isika hatramin’izay. Tamin’ireo 23 voaantso mantsy dia misy mpila ravinahitra 8, izay avy any amin’ny Olympic de Moroni atsy Comores ny ankamaroany ny 7 izany hoe efa mahay miaraka, ka i Aimée Christina Razanampiavy izay mpilalao avy any amin’io klioba io no voahosotra ho mpilalao mendrika indrindra tamin’ny lalao omaly. Iray kosa mpilalao avy any Allemagne dia i Zafisambondaoky Jocelyne, mpilalaon’ny Türkiyemspor. Irariana hitohy ny fahombiazana satria ho mafy kokoa ireo mpifanandrina roa hafa dia i Malawi sy Botswana izay nisaraka ady sahala 1-1 omaly !
Toky R
 

Tia Tanindrazana

Samia mijoro ho an'i Gasikara.