Sport

Copa Cocacola Fantatra ireo hanao manasa-dalana

Sport
Talata 11 Mey 2010

Vita ny alahady tontolo andro teo, tetsy amin’ny kianjan’ny Esca Antanimena, ireo lalao ampahefa-dalana amin’ilay fifaninanan’ny sekoly amin’ny baolina kitra sokajy 13-15 taona “Copa Cocacola”. Efa fantatra taorian’izany ireo sekoly efatra tafita hiatrika ny manasa-dalana. Ny kolejy Ste Famille Mahamasina hifandona amin’ny CEG Ambohimiandra an-daniny ary an-kilany ny Lycée Jules Ferry hifampitana amin’ny CEG Nanisana. Ireo vokatra teo amin’ny ampahefa-dalana : ny Ste Famille nandresy ny kolejy St Francois Xavier 2-0. Tsy niady kosa ny lalao faharoa izay nanamontsanan’ny CEG Ambohimiandra ny Collège de France 7-0. Hany Lycée tokana tafita izany ny Jules Ferry Faravohitra izay nampiondrika ny CEG Ampefiloha 3-1 ary ny lalao farany izay nandavoan’ny CEG Nanisana tamin’ny isa 1-0 ny Esca mpampiantrano. Hiroso amin’ny andro farany ny fifaninanana ny alahady 16 mey izao izay hanatanterahana ireo lalao ankatoky ny famaranana roa, harahin’ny fiadian-toerana laharana fahatelo ary ny famaranana.

Hery Rabe