Coach Rôrô

Mahasarika ireo klioba afrikanina

Sport
Alakamisy 04 Septambra 2025

Mahasarika ireo klioba afrikanina ny fahaiza-manaon’ny

mpanazatra ny ekipam-pirenena malagasin’ny baolina kitra na Barean’i Madagasikara, Romuald Rakotondrabe na Rôrô, raha ny fampitam-baovao voaray amin’izao fotoana izao. Isan’ny liana aminy ny AFC Leopards atsy Kenya sy ilay klioba mozambikanina Uniao Despirtiva do Songo. Ankoatran’ireo fahombiazany tamin’ny fitantanana ireo klioba divizionina voalohany teto Madagasikara dia iarahan’ny mpanara-baovao ara-panatanjahantena mahalala fa isan’ny nanandratra avo ny ekipam-pirenena sy ny voninahi-pirenena ny coach Rôrô, raha tsy hitanisa afa-tsy ny fahazoan’ny Barea ny laharana faha 3 tamin’ny tompondakan’i Afrika na CHAN 2022 sy ny laharana faha 2 tamin’ny CHAN 2024 ary ny medaly volamena tamin’ny lalaon’ny nosy 2023. Isan’ny andrandraina ny haneken’ity mpanazatra malagasy ity izay fifanarahana iraisampirenena izay satria dia heverina fa ho tombony ho an’ireo mpilalao avy eto an-toerana ihany koa izany noho ny fahafantaran’ny coach Rôrô tsara ny fifaninanam-pirenena avy eto an-toerana. Isan’ny mba nofinofin’ireo mpitia baolina kitra ihany koa ny hitomboan’ireo malagasy milalao anatina klioba sangany eto Afrika amin’ny alalan’izany rehetra izany.
Nangonin’i J. Mirija