Coach Rôrô,

fanazarana ny Barea CHAN

Sport
Alarobia 12 Aogositra 2026

Karama 540 tapitrisa Ar

tsy azoko ! Ny FMF nandray 1,2 tapitrisa dolara »
Voalaza fa mbola manodidina ny 540 tapitrisa Ariary ny karaman’ny Coach Rôrô na ny mpanazatran’ny ekipam-pirenena malagasin’ny baolina kitra teo aloha, Romuald Rakotondrabe, raha ny fampitàm-baovao voaray omaly. Mbola mitohy ny disadisa eo amin’ny Coach Rôrô sy ny Federasionina malagasin’ny baolina kitra na FMF mikasika ny karama lazaina fa tsy voaloa nanomboka ny volana novambra 2024. Araka ny fanazavan’ity mpanazatra ity dia 120.000 Dolara eo ho eo, izany hoe manodidina ny 540 tapitrisa Ariary, ny fitambaran’ny karama mbola tokony ho azony hatramin’ny oktobra 2026. Nambarany fa nandritra io vanim-potoana io, nahazo 1,2 tapitrisa dolara, izany hoe eo amin’ny 5,4 miliara Ariary, ny FMF taorian’ny nahatongavan’ny Barea teo amin’ny famaranana ny CHAN 2025 na tompondakan’i Afrika. Araka ny filazany ihany dia latsaky ny 10% amin’io vola azon’ny federasionina io ihany ny sandan’ny karama takiany, izay heveriny ho vokatry ny asa nataony sy ny ekipany nandritra ny fitondràna ny Barea. Na dia mbola tsy nahazo izany karama izany aza izy dia nilaza fa nanohy ny andraikiny hatrany ka nitondra ny Barea hatramin’ny famaranana ny CHAN 2025. Nohamafisiny ihany koa fa mbola manan-kery hatramin’ny oktobra 2026 ny fifanarahana nifanaovany tamin’ny FMF ary tsy mbola nametraka taratasy fametraham-pialàna izy, raha ny fampitàm-baovao voaray hatrany.
J. Mirija