CHAN 2025

Nanakana baolina betsaka indrindra tsy hiditra anaty harato i Toldo

Sport
Alatsinainy 25 Aogositra 2025

Mizotra amin’ny famiratana manokana hatrany ny mpiandry tsatobin’ny ekipam-pirenena

malagasin’ny baolina kitra na Barea, Michel Ramandimbisoa na Toldo, ao anatin’izao fiadiana izay ho tompondakan’i Afrika na CHAN 2025 izao. Nanakana baolina betsaka indrindra tsy hiditra anaty harato i Toldo hatreto. Miisa 20 izay tifitra voasakany izay, raha ny fanisàna voaray. Mpiandry tsatoby nahasakana baolina betsaka tao anaty faritra tsy azo ivalozana ihany koa izy. Nahavita izany in-11 izy. In-3 nosalorana ny amboara maha mpilalao mendrika indrindra tanatina lalao izy ary na ilay fihaonana tamin’ny ekipan’i Kenya nandritry ny ¼-dalana farany teo aza dia mbola niteraka adihevitra be hoe tokony ho lasany koa ny amboara tao anatin’iny lalao iny rehefa iverenana jerena ny lalao manontolo na tao anatin’ny 120 minitra io na tao anatin’ny tsotsoromamba na «Tirs au but». Efa 39 taona moa ankehitriny ity mpiandry tsatoby malagasy ity kanefa dia tena mbola kinga sy izao mampiaiky an’i Afrika iraimanontolo izao.
J. Mirija