Sport

CCOI Hand-ball Nanao pao-droa ny Reonioney

Sport
Talata 04 Desambra 2018

Nikatona tamin’ny sabotsy 1 desambra teo ny ridaon’ny fifaninanana Hand-ball niadiana ny ho tompondakan’ny Ranomasimbe Indiana ho an’ireo ekipa tompondaka lahy sy vavy amin’ny firenena 7 mpikambana.

Tsy misy fialantsiny azo ambara, hoy ny filohan’ny Federasiona Malagasin’ny taranja Hand-ball sady filohan’ny Faritra faha-7 amin’ity taranja ity aty Afrika, Fidèle Razafintsalama, fa nanatombo eo amin’ny lafiny rehetra ireo nosy ao amin’ny departemanta Frantsay dia i Mayotte sy La Réunion (ara-pitaovana, ara-teknika, ara-pizarana lalao goavana, ara-traikefa) ka nahatonga azy ireo niatrika ny lalao famaranana teo amin’ny sokajy lehilahy. Nanao pao-droa ry zareo Reonioney tamin’ity fifaninanana ity. Norombahan’izy ireo avokoa ny amboara sy ny medaly volamena.

Teo amin’ny vehivavy, ny Tamponnaise Hbc (La Réunion) nandresy ny Thbc (Madagascar) tamin’ny 25-17. Ny Château Morange (La Réunion) kosa teo amin’ny sokajy lehilahy nandavo ny Tsingoni (Mayotte) 39-29. Nitana ny laharana fahatelo avy vehivavin’ny Boueni avy any Mayotte ary ny lehilahin’ny As St Michel Madagasikara. Samy notolorana amboara avy ireo mendriky ny fifaninanana rehetra lahy sy vavy.

Ntsoavina Evariste