Sport

Beach Soccer Afrika 2018 Hanainga anio ny delegasiona Malagasy

Sport
Zoma 07 Desambra 2018

Rehefa nahazo tsodranon-draiamandreny nomen’ny mpikambana ao amin’ny Comité de normalisation teny Isoraka omaly alakamisy 06 desambra 2018 ny ekipam-pirenena Malagasin’ny taranja Beach Soccer dia hanainga anio

tolakandro amin’ny 2:30 eny amin’ny seranam-piaramanidina Ivato hihazo an’i Egypte hiatrika ny fiadiana ny ho tompondakan’i Afrika 2018 eo amin’ity taranja ity “CAN BEACH SOCCER 2018” izay hotontosaina manomboka ny 08 desambra hatramin'ny 14 desambra 2018 izao. Atoa Benony Jacques no filohan’ny delegasiona hitarika azy ireo izay ahitana mpilalao miisa 12.

Firenena 8 no hanana ekipa hisolotena azy avy any amin’ny fiadiana ny ho tompondakan’i Afrika andiany faha-9 eo amin’ny taranja Beach Soccer hotontosaina any Sharm El Sheikh any Egypte ity.

Ao amin’ny vondrona A ahitana an’i Egypta mpampiantrano, Côte d’Ivoire ary Maroc no misy an’i Madagasikara. Ny ao amin’ny vondrona B kosa no ahitana an’i Sénégal, Libye, Nigeria tompon’ny amboara farany ary i Tanzanie sambany vao handray anjara.

I Sénégal sy Nigeria nihaona tamin’ny famaranana farany (2016) no hanokatra ny fifaninanana amin’ny sabotsy 08 desambra 2018 izao amin’ny 12:00 any an-toerana arahin’ny fihaonan’i Libye sy Tazanie amin’ny 13:15 ary Egypte sy Maroc amin’ny 14:30. Amin’ny alahady 09 desambra 2018 amin’ny 12:00 egypsiana no hiditra an-tsehatra voalohany ny ekipam-pirenena Malagasy ka hihaona amin’i Côte d’Ivoire.

Ntsoavina Evariste