Sport

Basket-ball Malagasy Raikitra ny “Challenge FIBA 3x3” U 18

Sport
Zoma 23 Martsa 2018

Nambaran’ny FMBB sy ny mpikarakara ny FIBA 3x3 eto Madagasikara tetsy amin’ny Lapan’ny Fanatanjahantena omaly alakamisy 22 martsa fa hotanterahina ny 6 sy 7 aprily ho avy izao ny “Challenge FIBA 3x3” sokajy U 18.

Ekipa 32 lehilahy sy 16 vehivavy avy amin’ny ligy rejionaly 20 sy sekoly maromaro ary klioba vitsivitsy eto amintsika no handray anjara amin’ny fifaninanana. Hifanindran-dalana amin’ity hetsika koa ny 3x3 Show Dance izay fifaninanana dihy handraisana tarika tanora mpandihy miisa 10. Natao ity “Challenge” ity mba ho fanaparihana ny basket-ball 3x3 sy hifantenana ireo zatovolahy sy zatovovavy handrafitra ny ekipa nasionaly Malagasy hiatrika ny “Jeux Africains des Jeunes” hotontosaina any Alger amin’ny volana jona 2018. Ny ekipa 5 lahy sy vavy mendrika amin’ny fifaninanana dia hotolorana vola sahaza ny laharany avokoa ka ny voalohany dia hahazo 300.000 ariary, ny faha-2 homena 200.000 ariary ary ny faha-3 dia hahazo 100.000 ariary. Ny 30 martsa ho avy izao amin’ny 6 ora hariva no fara-fisoratana anarana hoan’izay liana handray anjara ary ho maimaimpoana ny fidirana hijery ny hetsika.

Ntsoavina Evariste