Sport

Partagé sur :
• facebook

Rava teo ny nofinofy samihafan’ny Barean’i Madagasikara dia ny mba handeha hiatrika ny dingana famaranan’ny CHAN 2018 any Kenya

sy ny fahazoan’ireo mpilalao tsirairay ny lelavola 50 tapitrisa ar nataon’ny Federasiona « Prime » ho azy ireo raha tafita ho any amin’io CHAN voalaza teo io, satria dia resin’ny Palancas Negras Angola tamin’ny isa 1-0 tany Luanda ny sabotsy 19 aogositra hariva teo, lalao izay narahin’ny mpitia baolina kitra nivantana tamin’ny onjam-peon’ny RNM. Baolina tafiditr’i Dany mpilalao Angoley teo amin’ny ministra faha-62 no niantoka io fandresen-dry zareo io taorian’ny penalty tsy matin-dry zareo teo amin’ny minitra faha-50. Mbola 0-0 anefa ny isa teny amin’ny tabilao tamin’ny fotoam-pialantsasatra. Raha ny marina dia nanjaka teo amin’ny afovoan’ny kianja ny Angoley ary mafy hidy koa ny azy ny vodilaharana ka tsy nahita mangirana mihitsy ry Njiva mbamin-dry Bela. Nateti-pihavy koa ny an-dry zareo ny fanafihana ka zary nandreraka an’ireo vodilaharana Malagasy notarihan’i Ando nony farany. Ambetin-dresaky ny mpanafy lalao baolina kitra taorian’ny fihainoana an’iny lalao tany Luanda iny ny hoe : “Ahiana mbola manjaka ny fomba ratsy amin’ny fifidianana mpilalao hiakatra kianja amin’ny ankapobeny” sa ireo mpanazatrantsika mifandimbindimby mandray an-tanana ny Barea no efa tsy maharaka ny fivoaran’ny famonoana baolina maoderina intsony ? Tokony nampiarahana hatrany ireo efa mahay miaraka ao amin’ity Barea ity, hoy ny maro, tahaka izany ohatra i Bila sy Bela, Nono sy Ndimby sns… fa tsy izay tian’ny mpanazatra ihany no tsy hesorina mihitsy na dia efa hita ho tsy mahomby aza. Tsy nety ve raha nafarana manokana indray na dia nandaniam-bola be aza i Dupuis nanazatra ireny Barea Chan ireny tahaka ny an-dry zareo Angoley ohatra dia vahiny no nanazatra azy ireo ? Ka eto am-pamaranana dia lazaina fa na inona na inona filaza mikasika iny lalao iny dia efa nihintsana fa resy ny Barean’i Madagasikara.

Ntsoavina Evariste

Tia Tanindrazana

Samia mijoro ho an'i Gasikara.