Sport

Barean’i Madagasikara Amboara sisa tsy azo

Sport
Talata 23 Jolay 2019

Tao anatin’ireo fihaonana miisa 5 natrehin’ny ekipam-pirenena malagasin’ny baolina kitra nandritry ny tompondakan’i Afrika nifarana ny zoma teo iny dia in-4 azon’ny Malagasy hatrany ny amboaran’ny mpilalao mendrika.

Abel Anicet, in-droa, ary I Carolus Andrea sy Marco Ilaimaharitra, iray avy. Isika ihany koa no nahazo ny laharana voalohany taminn’ny alalan’i Ibrahim Amada, ho an’ny baolina maty tsara indrindra. Ny mpanazatra ny Barean’i Madagasikara, Nicolas Dupuis, no voahosotra ho mpanazatra mendrika indrindra. Voalohany tamin’ireo ekipam-pirenena tafita hiatrika ny CAN 2019 ny Malagasy tamin’ity ary voalohany ihany koa tao anaty vondrona B izay nisy azy nandritry ny fifaninanana isam-bondrona tao anatin’ny dingan’ny famaranana kanefa sambany nandray anjara ary nahavita lalao 5 sahady raha toa ka lalao miisa 4 dia efa nahatafakarana dingan’ny ampahefa-dalan’ny CAN ho an’ireo fifaninanana tany aloha. Mazava ho azy fa isika ihany koa no voafidy ho ekipa nanao ny tsy ampoizina na “revelation” tao anatin’ity fifaninana ity. Raha fehezina, amboara sisa tsy azon’ny Barea tamin’iny CAN 2019 iny ary antenaina fa ho tanjona amin’izay izany amin’io CAN 2021 io.

J. Mirija